श्रीरामाचे विडंबन असलेल्या `स्लमडॉग मिलेनियर’ चित्रपटाच्या विरोधात हिंदू संतप्‍त !

हिंदु जागा होतोय, याची चुणूक म्हणजे जळगाव, पणजी व मुंबई येथील स्फूर्तीदायी निदर्शने !

* हिंदु जनजागृती समितीच्या आंदोलनाला सुरुवात * दादर येथे समितीची निदर्शने

मुंबई, २३ जानेवारी (वार्ता.) – कोट्यवधी हिंदूंच्या श्रद्धास्थानी असलेले भगवान श्रीराम व भारतीय संस्कृती यांची प्रतिमा मलीन करून गल्ला भरू पहाणार्‍या `स्लमडॉग मिलेनियर’ या चित्रपटावर त्वरित बंदी आणावी, या मागणीसाठी आज हिंदु जनजागृती समिती, मुंबईतर्फे दादर (पू.) रेल्वेस्थानकानजीक निदर्शने करण्यात आली.

`स्लमडॉग मिलेनियर’ चित्रपटावर बहिष्कार घाला ! बहिष्कार घाला !!

दादर रेल्वेस्थानकानजीक निदर्शने करतांना हिंदु जनजागृती समितीची कार्यकर्ते

या चित्रपटात एका लहान मुलाला श्रीरामाच्या वेशात दाखवण्यात आले आहे. जमाल मलिक हा चित्रपटातील नायक त्या श्रीरामाला पाहून मरणाच्या भीतीने पळत सुटतो. अशा प्रकारे जाणीवपूर्वक श्रीरामाला मुसलमानांना ठार करणारा, असे दर्शवण्याचा प्रयत्‍न करण्यात आला आहे. त्यासाठी १९९२-१९९३ या मुंबईतील जातीय दंगलीचा संदर्भ देण्यात आला आहे. तसेच या प्रसंगामुळे मुंबईत हिंदू मुसलमानांना ठार करतात, असे खोटे दाखवण्यात आले आहे. या सर्व प्रकारांमुळे हिंदु व मुसलमान या दोन धर्मांमध्ये तेढ निर्माण होईल. तसेच कायदा आणि सुव्यवस्थेला धोका पोहोचू शकतो, असे हिंदु जनजागृती समितीचे मुंबई, ठाणे व रायगड या जिल्ह्यांचे समन्वयक श्री. शिवाजी वटकर यांनी सांगितले. यासंबंधी समितीच्या संकेतस्थळावरही दोन दिवसांपासून निषेधाची चळवळ सुरू करण्यात आली आहे. त्यावर जगभरातील हिंदू या चित्रपटाच्या विरोधात संतापजनक प्रतिक्रिया नोंदवत आहेत, असेही श्री. वटकर म्हणाले. या वेळी समितीच्या कार्यकर्त्यांनी प्रबोधनपर फलक हाती घेऊन शांततेत निदर्शने केली. निदर्शनस्थळी तब्बल २५ पोलिसांचा फौजफाटा होता.

संतप्‍त हिंदू `स्लमडॉग मिलेनियर’ या चित्रपटाचे नायक श्री. अनिल कपूर यांना त्यांच्या anil@anilkapoor.net इ-पत्रावर व http://www.anilkapoor.net/html/index.html# या त्यांच्या संकेतस्थळावर निषेध नोंदवत आहेत.

पोलीस महासंचालक व पोलीस आयुक्‍त यांना तक्रार दाखल
मुंबई – महाराष्ट्र राज्याचे पोलीस महासंचालक व मुंबईचे पोलीस आयुक्‍त यांच्याकडे आज हिंदु जनजागृती समितीचे मुंबई, ठाणे व रायगड जिल्ह्यांचे समन्वयक श्री. शिवाजी वटकर यांनी `स्लमडॉग मिलेनियर’ या चित्रपटाच्या विरोधात तक्रार दाखल केली.
आज या चित्रपटाच्या प्रदर्शनाचा प्रथम खेळ वडाळा येथील `आयमॅक्स’ या चित्रपटगृहात लावण्यात आला. त्या पार्श्‍वभूमीवर समितीच्या सदस्यांनी हे चित्रपटगृह ज्या पोलीस ठाण्याच्या हद्दीत येते, त्या वडाळा पोलीस ठाण्यात तक्रार दाखल करून हा खेळ होऊ देऊ नये, अशी मागणी केली. या वेळी येथील साहाय्यक पोलीस आयुक्‍त श्री. बाविस्कर व पोलीस उपायुक्‍त श्री. पांडुरंग शिंदे यांनी या प्रकरणी समितीच्या सदस्यांशी चर्चा केली. या वेळी हिंदु जनजागृती समितीचे श्री. प्रसाद मानकर, शिवसेनेचे उपशाखाप्रमुख श्री. शैलेश भेस्के, सनातन संस्थेच्या कु. अरुणा घाडी आदी उपस्थित होते. या वेळी या पोलीस अधिकार्‍यांनी समितीचे निवेदन चित्रपटगृहाचे मालक व सरकार यांना देऊ, असे आश्‍वासन दिले. या चित्रपटाच्या प्रदर्शनाच्या विरोधात तीन दिवसांपूर्वी हिंदु जनजागृती समितीतर्फे चित्रपट परिनिरीक्षण मंडळाकडे तक्रार दाखल करण्यात आली होती. मंडळाच्या विभागीय अधिकार्‍यांनी समितीचे म्हणणे मंडळाच्या अध्यक्ष श्रीमती शर्मिला टागोर यांच्यापर्यंत पोहोचवू, असे सांगितले.

मुंबईत कडेकोट पोलीस बंदोबस्तात चित्रपटाचे खेळ सुरू
आज मुंबईतील काही चित्रपटगृहांत हा खेळ दाखवण्यात आला. येथे कडेकोट पोलीस बंदोबस्त ठेवण्यात आला होता. भोईवाडा येथील `धरती’ या छोट्या चित्रपटगृहालाही पोलिसांनी कडक सुरक्षाव्यवस्था पुरवली होती. (हिंदूंनो, हिंदुद्रोही व भारतद्वेषी चित्रपटाला संरक्षण पुरवणारे पोलीस व चित्रपटाला पाठिशी घालणारे राज्यकर्ते यांना येत्या निवडणुकीत घरचा रस्ता दाखवा ! – संपादक)