हिंदुहृदयसम्राट श्री. बाळासाहेब ठाकरे यांना वाढदिवसानिमित्त सस्नेह नमस्कार

`स्लमडॉग मिलेनियर’ चित्रपट थांबवण्यास `सेन्सॉर’चा नकार

हिंदूंच्या भावनांचा अनादर करून हिंदुद्रोही चित्रपट थांबवण्यास नकार देणार्‍या `सेन्सॉर’ मंडळाचा धिक्कार !

मुंबई, २१ जानेवारी (वार्ता.) – प्रभु श्रीरामचंद्र व भारतीय संस्कृती यांचे विडंबन करणारा `स्लमडॉग मिलेनियर’ हा चित्रपट प्रदर्शित करू नये, असे निवेदन हिंदु जनजागृती समितीने केंद्रीय चित्रपट प्रमाणपत्र मंडळाला दिले होते. या निवेदनानुसार आज हिंदु जनजागृती समितीचे शिष्टमंडळ व मंडळाचे विभागीय अधिकारी श्री. विनय आझाद यांच्यात चर्चा झाली; मात्र चित्रपटाला आधीच प्रमाणपत्र देण्यात आले असल्याने चित्रपटाचे प्रदर्शन थांबवण्यास असमर्थ असल्याचे श्री. आझाद यांनी सांगितले.

(मुसलमानांनी अशा प्रकारची तक्रार आणली असती तर त्यांना असे उत्तर देणे शक्य झाले असते का ? हिंदूंच्या भावनांची किंमत केली जात नाही, ही वस्तूस्थिती अजून किती दिवस टिकणार आहे ? – संपादक) या चित्रपटात हिंदु-मुस्लीम दंगल घडतांना एका लहान मुलाला श्रीरामाच्या वेशात दाखवले आहे. जमाल हा चित्रपटाचा नायक त्या श्रीरामाला पाहून मरणाच्या भीतीने पळत सुटतो, असे यात दाखवले आहे. या दृश्यामुळे हिंदूंच्या धार्मिक भावना दुखावल्या आहेत, तसेच हिंदू मुसलमानांवर अत्याचार करत आहेत, असे एकांगी दाखवले आहे. संपूर्ण चित्रपटात भारत म्हणजे गरीबी, दंगली, वेश्याव्यवसाय, अशा प्रकारचे बीभत्स वर्णन दाखवले आहे. त्यामुळे या चित्रपटाला प्रमाणपत्र देऊ नये, अशी मागणी समितीने या चर्चेदरम्यान केली. (भारताची प्रतीमा जगभरात डागाळणार्‍या चित्रपटाला प्रमाणपत्र देणार्‍या केंद्रीय चित्रपट प्रमाणपत्र मंडळाचा हा हिंदुद्रोह व राष्ट्रद्रोहच म्हणावा लागेल. हा चित्रपट बंद पाडण्यासाठी भारतीय राज्यकर्ते काही करतील काय ? – संपादक) श्री. आझाद यांनी सांगितले, “एका पुस्तकावर आधारलेले हे काल्पनिक कथानक आहे. हा माहितीपट (डॉक्युमेंट्री) नसल्याने दंगलीच्या दरम्यानच्या सर्वच गोष्टी दाखवलेल्या नाहीत. इतर बर्‍याच चित्रपटांमध्ये दंगलीच्या बाबतीत चित्रण केलेले असते. रामाचा अवमान होईल, अशा स्वरूपातील हे दृश्य नाही, त्यामुळे परीक्षण मंडळाने इंग्रजी चित्रपटाला `अ’ प्रमणापत्र (फक्‍त प्रौढांसाठी) व हिंदी चित्रपटाला `यु/अ’ प्रमाणपत्र (१२ वर्षांपुढील दर्शकांसाठी व १२ वर्षांखालील मुलांना पौढांसोबत) दिलेले आहे. आता मंडळाने हे प्रमाणपत्र दिले असल्याने आम्ही चित्रपट प्रदर्शन थांबवू शकत नाही”, असे त्यांनी सांगितले. अध्यात्मशास्त्रानुसार चित्रपटातील श्रीरामाचे चित्रीकरण चुकीचे असून त्यामुळे श्रद्धेला तडा जाणार आहे, असे समितीने श्री. आझाद यांनी स्पष्ट केले. त्यानंतर त्यांनी मंडळाच्या कार्यकारी मंडळात हे निवेदन चर्चेसाठी ठेवण्याचे आश्‍वासन दिले; मात्र चित्रपटाचे प्रदर्शन थांबवणे मंडळाच्या हातात नसून केंद्रीय माहिती व प्रसारण मंत्रालय किंवा न्यायालयीन आदेशाद्वारेच हा चित्रपट थांबू शकेल, असे मत त्यांनी व्यक्‍त केले. समितीच्या शिष्टमंडळात सर्वश्री शिवाजी वटकर, अनित पिंपळे व सौ. वर्षा ठकार यांचा समावेश होता. समितीचे सदस्य सौ. पौर्णिमा प्रभू व श्री. मोहन गौडा यांनी हिंदु जनजागृती समितीच्या वतीने `कर्नाटक फिल्म चेंबर ऑफ कॉमर्स बंगळुरू’ आणि `फिल्म सर्टिफिकेशन बोर्ड कर्नाटक’ यांना हा चित्रपट प्रदर्शित करू नये, यासाठी निषेधपत्र दिले आहे. तसेच समितीच्या संकेतस्थळावरही या चित्रपटाच्या विरोधात निषेध मोहीम सुरू आहे. धर्माभिमानी पुढील पत्त्यावर निषेध नोंदवत आहेत.
पत्ता : सेंट्रल बोर्ड ऑफ फिल्म सर्टिफिकेशन, भारतभुवन, ९१ इ, वाळकेश्‍वर रोड, मुंबई ६.
संपर्क : दू.क्र. : (०२२) २३६९ ९२५५, २३६२ ५७७०
फॅक्स : २३६९ ००८३
इ-मेल : aocbfcmum@rediffmail.com