मुंबई, २६ सप्टेंबर (वार्ता.) – गणेशोत्सव, दिवाळी आदी सणांच्या वेळी हिंदूंच्या देवता व राष्ट्रपुरुष यांची चित्रे असलेल्या फटाक्यांची सर्रास विक्री होते. हे फटाके फोडल्यावर त्यांवरील वेष्टनाच्या चिंधड्या उडतात. त्यामुळे देवता व राष्ट्रपुरुष यांची विटंबना होते. या विटंबनेच्या विरोधात हिंदु जनजागृती समिती गेली पाच वर्षे शासनाकडे निवेदनाद्वारे `देवता व राष्ट्रपुरुष यांची चित्रे असलेले फटाके उडवण्यावर बंदी घालावी’, अशी मागणी करत आहे.
या वर्षी हिंदु जनजागृती समितीतर्फे विधानसभेचे विरोधी पक्षनेते श्री. रामदास कदम यांना निवेदन देण्यात आले. त्यांनी त्याची दखल घेत तातडीने स्वत:च्या `लेटरहेड’वर मुख्यमंत्री, उपमुख्यमंत्री, व्यापारचिन्ह विभाग व मुंबई महापालिकेचे आयुक्त यांना पत्र पाठवले आणि अशा फटाक्यांवर बंदी घालण्यासाठी तातडीने कायदेशीर कारवाई करण्याची शिफारस केली. याचबरोबर “या संदर्भात आतापर्यंत शासनातर्फे काय कारवाई झाली, याचा येत्या हिवाळी अधिवेशनात मी सरकारला जाब विचारणार आहे”, असे आश्वासनही श्री. कदम यांनी दिले. (देवता व राष्ट्रपुरुष यांच्या विटंबनेच्या विरोधात तत्परतेने कृती करणारे असे हिंदु नेते सर्वत्र हवेत ! – संपादक) हिंदु जनजागृती समितीतर्फे देवता व राष्ट्रपुरुष यांची चित्रे असलेल्या फटाक्यांवर बंदी घालावी म्हणून मुख्यमंत्री, उपमुख्यमंत्री, उद्योगमंत्री, उद्योगमंत्र्यांचे खाजगी सचिव श्री. राजीव निवटीकर, उद्योग महासंचालनालयाचे अधिकारी श्री. राठोड, मुंबई महापालिकेचे आयुक्त डॉ. जयराज फाटक आणि व्यापारचिन्ह विभागाचे सहनिबंधक यांना निवेदने देण्यात आली आहेत. निवेदने देतांना शिष्टमंडळात समितीचे मुंबई, ठाणे व रायगड या जिल्ह्यांचे समन्वयक श्री. शिवाजी वटकर, सदस्य सर्वश्री प्रकाश करंदीकर, सदानंद पांचाळ, मिलिंद पोशे व अन्य सदस्य उपस्थित होते.
