पुणे, १२ जुलै (वार्ता.) – येथील एम्.आय.टी. महाविद्यालयाने स्थानिक गुणवान विद्यार्थ्यांना डावलून परप्रांतीय विद्यार्थ्यांना प्रवेश दिल्याच्या प्रकरणी महाराष्ट्र नवनिर्माण सेनेच्या कार्यकर्त्यांनी आज महाविद्यालयात तोडफोड केली.
महाराष्ट्राची शैक्षणिक राजधानी असलेल्या पुण्यामध्ये शैक्षणिक संस्थांमध्ये वाढ झाली आहे; मात्र या संस्थांमध्ये स्थानिक गुणवान विद्यार्थ्यांना डावलून परप्रांतीय विद्यार्थ्यांकडून भरमसाठ शुल्क आकारून त्यांना प्रवेश दिला जातो. याबाबत स्थानिक विद्यार्थी संघटनांनी आवाज उठवला होता. असे असतांनाही एम्.आय.टी. महाविद्यालयाने स्थानिक विद्यार्थ्यांना डावलून परप्रांतीय विद्यार्थ्यांना प्रवेश दिला. स्थानिकांवर झालेल्या या अन्यायामुळे आज दुपारी महाराष्ट्र नवनिर्माण सेनेच्या कार्यकर्त्यांनी महाविद्यालयाच्या आवारात जाऊन तेथील साहित्याची तोडफोड केली, तसेच महाविद्यालयाचे संचालक
श्री. मंगेश कराड यांच्या कार्यालयाचीही तोडफोड केली. श्री. कराड यांच्याशी मनसेचे कार्यकर्ते चर्चा करण्यास गेले होते; मात्र श्री. कराड यांच्याकडून त्यांना अपेक्षित असा प्रतिसाद मिळाला नाही, त्यामुळे हा हल्ला केल्याचे मनसेकडून सांगण्यात आले.
याबाबत श्री. कराड म्हणाले, “आम्ही भारतीय घटनेनुसार देशातील कोणत्याही गुणवान विद्यार्थ्याला महाविद्यालयात प्रवेश देतो. महाराष्ट्रातील मराठी विद्यार्थीही त्यात आहेत.”
